黎姿睇淡名利宣布引退


2008-10-21 07:00
上一則新聞: 郭羨妮為拎獎等到六十歲

 



入娛樂圈超過二十年的黎姿(GiGi),去年因弟弟黎嬰遇上嚴重車禍,曾宣布停拍劇一年以方便照顧細佬,昨晚她突然宣布全面退出娛圈,《珠光寶氣》將會是其演藝生涯中最後一部電視劇,黎姿說細佬的意外令她睇淡名利,現已無憾!

黎嬰於去年五月卅日發生嚴重交通意外,長時間留院醫治,GiGi衣不解帶的照顧弟弟,昨晚GiGi跟《珠光寶氣》一眾演員蔡少芬(Ada)、陳豪、李司棋、邵美琪、林保怡等亮相《東張西望》的「珠光寶氣閃爍夜」直播節目,直播前見黎姿分別跟曾勵珍、樂易玲及好姐妹Ada咬耳仔,神色古怪,接Ada拖住GiGi做訪問,GiGi即說:「今次係我最後一次做訪問,《珠》劇亦係最後一部電視劇,之後會做番自己,照顧細佬,同埋打理佢生意。」

否認為嫁人
追問GiGi是否全面退出?她說:「係,廣告唔會拍、頒獎禮唔會出,唱片、電影都唔做啦。(又要照顧細佬,經濟有冇問題?)人生中,錢唔係最重要,最緊要一家人齊齊整整,依家係最滿足,兩年前未出事前,都打算拍完《珠》劇唔再拍,當時細佬都好支持,佢意外加速對人生、對名利睇法,平淡是福,想做番平凡普通人,做番小女人。」

她是否退出「嫁人」?GiGi否認說:「唔係。(咁有冇諗住結婚搵人照顧你?)將來一定會嫁人,依家有父母照顧,唔使搵人照顧。(同TVB合約是否完結?)同佢關係唔係計有冇合約,我一世都係TVB人。」對今次決定,拍攝《珠》劇時已諗過,但細佬發生意外才沒有處理,一等就兩年,而且拍了劇集就有責任做宣傳,所以現在才講。

已沒有遺憾
提到有這個念頭時,黎姿淚盈於睫的說:「做呢行廿幾年,好多都做過,拍電影、出唱片都試過,好感恩、好有滿足感,我唔係想進軍荷里活,要行人生另一階段,我十幾歲入娛樂圈,依家差唔多四十歲,應該畀多時間做人生其他,例如讀書、返學、照顧屋企人同打理細佬生意。(有冇遺憾?)我已經無憾,有好多人同我一齊度過,好多謝邵美琪、Ada等全劇工作人員忍耐同體諒,亦多謝珍姐提攜我,呢件事我之前都有同佢商量。」

黎姿在《東張西望》中亦坦承《珠》劇是其演藝生涯最後一部電視劇,坐在她身旁的陳豪即輕拍GiGi肩膊以示安慰,司棋姐亦不捨得她,節目後,她離開電視城即直接返家。

文:影視組

贊助商:

討論:
分享: