絲絲講場:李文岳嚴管誠信行先


2009-07-30 07:00

跟蹤提及過的人和物:

上一則新聞: 絲絲講場:郭炳江教女費盡心思

 

絲絲同粵海集團嘅朋友食飯,席上提到佢老細李文岳,老友即時反應係:「哇!佢好嚴㗎!」原來李總份人好講原則,佢曾經話社會咁大唔輪到佢話事,但作為公司董事長,佢就要喺公司內推行誠信、廉潔嘅文化。老友話試過好多次有同事因誠信有啲問題,唔係被炒就係降職,有一年粵海上上下下走咗成90人咁滯,唔多唔少與此有關。李總揸正嚟做,賞罰分明,令公司同事對佢既敬且畏。

絲絲諗起有次同李總傾偈時,佢都話自己喺金融危機時加入粵海,同前董事長武捷思一齊搞呢次全亞洲最大宗嘅債務重組,之所以發生債務重組呢件事,其中除咗管理不善外,與部分職員誠信有問題有不可抹殺嘅關係,前車可鑑,所以佢依家揸到咁正嚟做。

寧聘愚人唔揀小人



李總話,司馬光嘅《資治通鑑》內有句說話:「有德有才為之聖人,有德無才為之君子,有才無德為之小人,無才無德為之愚人」,當然佢用人最希望請到聖人同君子,如果得小人同愚人佢揀,佢寧願揀愚人都唔揀小人,事關前者唔會諗計做壞事,但小人可以做出天大嘅壞事。

余絲韻

贊助商:

討論:
分享: