政情:許曉暉同囡囡沖涼教洗衫


2012-12-03 07:00

跟蹤提及過的人和物:

上一則新聞: 政情:鬍鬚曾對007「感同身受」

 

相信唔少在職媽媽都有一個煩惱,就係點樣喺排到密麻麻嘅時間表中抽時間親子。好似民政事務局副局長許曉暉(Florence)都唔例外,因為佢有時一日要走幾場活動,即使兩個囡囡放假都未必抽到時間陪佢哋。不過,Florence有奇招應對,可以喺有限時間做到多功能親子。

為免囡囡過分依賴,變成一個咩都唔識嘅港孩,Florence一有時間就會帶囡囡去街市見識吓,仲會不時「獎勵」囡囡,同囡囡一齊沖涼!Florence話,會趁沖涼時間教埋囡囡洗衫,依家佢嘅七歲大女已經識得自己洗手巾仔同底衫仔。沖一次涼既能增進感情,又教埋小朋友做家務,呢個親子活動認真功能性十足。

今時今日嘅小朋友,學番一體一藝傍身好似已經係最低要求,但Florence就話,見到太多怪獸家長嘅反面教材,所以一切都係興趣先行,而且好注重小朋友嘅身體健康,所以一早就諗定安排囡囡學一種運動,呢種運動非常冷門,就係武術喇!Florence話,遲啲等囡囡大個啲,手腳協調得好啲就會安排佢哋學吓詠春,有助伸展筋骨,而以柔制剛嘅詠春就最啱女仔喇。

贊助商:

討論:
分享: