陳宛蔚頻撲派餅錢國偉呵鑊金


2015-10-06 07:00

跟蹤提及過的人和物:

上一則新聞: 張繼聰開騷驚被Kay搶鏡

 

後日(10月8日)是嫁娶好日子,3pair情人將舉行婚禮共諧連理,包括Angelababy與黃曉明、導演錢國偉(Wilson)與陳宛蔚、以及前亞視高層盛品儒與蔡一鳳。Baby及曉明的上海世紀婚宴將有「秘密武器」,請來女星李冰冰做伴娘,至於陳宛蔚為婚禮細節搞到壓力爆燈,Wilson即識做買金器呵番未婚妻。

導演錢國偉(Wilson)及女友陳宛蔚(Calinda)後日在洲際酒店舉行婚禮,筵開約50席花費逾百萬元,因Wilson近月忙爆,經常要出埠搞騷及開會,婚禮事宜及財政大權全部交予Calinda。早前Calinda現身中環,準備將喜餅派予好友,喜歡親力親為的她雖有工人幫手,仍手挽幾袋重物,行上蘭桂坊斜路時更喘晒氣兼抹晒汗!

睇中頸鏈



深知未婚妻為婚事奔波,「愛妻號」Wilson自然識做,親自出動買首飾出冧招!日前兩小口子冒雨到尖沙咀睇金器,挽手同擔一把遮,實行風雨同路!兩人抵達金舖後,獲貴賓式五名sales包圍服侍,期間兩人有睇龍鳳鈪及頸鏈,Calinda試戴了幾款「重型」頸鏈,Wilson有參與意見並搞Gag氹未婚妻,但男士對金飾的專注力始終不及女士,慢慢跌Watt的Wilson再度為公事煩惱,頻覆message又來回踱步想走咁款,最後Calinda睇中一條頸鏈,Wilson即撢荷包畀錢,兩人拿着戰利品溫馨返歸。

造人隨緣



事後Calinda接受電話訪問,承認婚禮瑣事繁複又不停超支,令她一度緊張得甩頭髮,近日已睇中醫調理,問有否怪Wilson參與率低?她說:「唔會!知佢工作好忙,一直欣賞佢事業為重,但大家睇法有啲唔同,我希望盡善盡美,佢就鍾意順其自然。(當日去睇金器?)其實一早準備咗首飾,但媽咪都叫我哋睇吓金。」她表示Wilson近期有買頸鏈及手鈪給她,價值達六位數字,並冧爆說:「幾錢唔緊要,物輕情意重!」問到婚後會否努力造人?她說:「忙埋呢輪要休息一下,想過二人世界先!隨緣啦!」

文:影視組

贊助商:

討論:
分享: