縱然病重 堅持開心


2015-12-22 07:00
上一則新聞: 早年離婚內地再續弦

 

資深藝員鄺佐輝從事影視工作37年,曾與眾多台前幕後合作,當噩耗傳出後,與他相識相知的圈中人無不感哀傷。

吳沅儀



兩星期前探過佢,嗰陣面色好差、好攰,但佢堅持畀個開心樣我哋見,送我哋走嗰時仲話要送到出門口,講完拜拜仲講埋聖誕快樂,嗰個神情係笑住但望落就好攰,好似有預感係講永別咁,最終真係過唔到聖誕。我好多謝佢,十幾年前我個仔想入一間小學,曾經要鄺佐輝幫手,佢識得人就義不容辭答應幫手,仔仔成功入到學。

薛家燕



聽到呢個消息當然難過,我希望鄺佐輝嘅家人節哀順變。佢係一名好好先生,一直非常積極面對呢個病。近年都有好多人因為癌症而離世,希望大家都關注呢啲病,同埋大家要好好珍惜擁有嘅一切。

譚玉瑛



輝哥係第七期訓練班,我就係第九期,兩星期前探過佢,當時情況幾好,但星期四再去已經係昏迷狀態,冇得清醒見面傾偈,直到昨晚聽到佢病逝,覺得好可惜,但解脫咗痛楚。中國人俗語,聽日做冬,最後都過唔到。

盧海鵬



同鄺佐輝唔熟,但有份排毅進同學會嘅劇,以前都係訓練班但唔同期,有時啲慶祝活動都有見面,去年都有一齊唱K,59歲始終仲後生。

關菊英



大家有合作過,佢個人好正面,成日做醫生(角色),好老實又斯文。聽人講知道佢過身,好難過,希望佢家人唔好傷心。

戚美珍



佢當年係《K100》嘅台柱,嗰時我就以(藝訓班)師妹身份參與,成日都有接觸,但近年就比較少見。之前都有同廖安麗講起鄺佐輝嘅病情,但估唔到佢咁快就離開。若果家人打算搞公開告別儀式,我一定會到場鞠躬。

贊助商:

討論:
分享: