袁詠儀撐梁小冰 Chilam阻止:收聲當幫忙!


2016-12-03 07:00

跟蹤提及過的人和物:

上一則新聞: 黃德斌出拳打監製

 

影后袁詠儀(靚靚)與老公張智霖(Chilam)昨日結伴出席廣告頒獎禮,提到同屆港姐梁小冰與陳法蓉近日的是非,靚靚即為相識27年的小冰護航,指對方若非受很大傷害絕不反駁,並支持小冰退會。在旁的Chilam擔心老婆捲入是非,欲出言阻止她繼續發言,沒料反被靚靚推開,場面惹笑!

袁詠儀(靚靚)、張智霖及徐榮昨日出席無綫舉行的《最強人氣品牌大獎2016》活動,夫妻檔現身的靚靚及Chilam分別獲得「最強人氣廣告天王」及「最強人氣廣告天后」。

港姐出身的靚靚,對於同屆的小冰日前出席「慧妍雅集」活動未有穿大會外套,因而被陳法蓉責罵,靚靚力撐小冰:「我哋27年友誼,我唔喺現場唔方便評論誰是誰非,佢係一個唔受到好大傷害都唔出聲嘅人,唔逼到去一個走唔到嘅位置唔會反駁,發咁大脾氣,我聽完就諗到佢一定會爆喊。(佢話退會喎!)退囉!我都唔係嗰個會。」

暗寸「冇咁榮幸撞到」



在旁的老公張智霖為免太太捲入是非,即出言打圓場說:「香港小姐係代表香港美貌與智慧並重,作為旁觀者應該收聲當幫忙,保持港姐形象。」但靚靚聞言即推他離開:「夠喇!你走開啦!」並繼續為小冰發聲,指太了解對方為人,問可了解陳法蓉為人?靚靚說:「工作未撞過,生活圈子唔一樣。(佢喺內地發展?)係咩?唔係好見喎!可能我少喺內地發展啦!冇咁榮幸撞到,就算見到面都冇乜點,可能有記者在場好啲啦!」

對於小冰留言表示要出外散心,靚靚說:「其實都唔使,佢有咁嘅行為即係覺得自己冇錯,希望大家明白佢,但輿論壓力就講到佢小事化大咁,佢唔係咁嘅人,希望佢快啲冇事,我一定撐佢。(件事係因為唔着制服喎!)唔着就畀人鬧?咁我咪冇入會囉!」

而Chilam表示與老婆獲不少贊助商疼錫,故平日慳回不少,反而買東西給老婆支出最大,不過靚靚即呼不公,笑言只在其薪酬攞賠償,要求唔高!

文:影視組

贊助商:

討論:
分享: