劉佩玥做小三險抑鬱


2016-12-17 07:00

跟蹤提及過的人和物:

上一則新聞: 遭狂加租 上山火鍋店結業

 

港姐出身的無綫小花劉佩玥(Moon),雖然樣貌未算很標致,但勝在形象夠入屋,即使最近於新劇演「小三」也未惹人憎厭,更一反常態被大讚可愛。不過一片讚美聲音背後,Moon直言該角色為她帶來重重壓力,免疫系統亂晒龍,導致皮膚過敏兼生滿粒粒,更差點患上抑鬱症,如今獲得甚大回響,總算有所交代。感情世界方面,Moon坦承與伍允龍非常夾,一見面就會講笑,暫時的確好好朋友,但對將來能否成為真情侶卻有所保留。

演技躍進迎入行後最大挑戰



從無綫劇集《四個女仔三個BAR》、《城寨英雄》,至近期的話題作《幕後玩家》,漸漸看見劉佩玥(Moon)的演技躍進!今次Moon於《幕》中,飾演介入黃宗澤(Bosco)及龔嘉欣婚姻的第三者,名正言順「小三」一名,故對戲齡尚淺的她來說絕對是大挑戰。她不諱言角色跟本身性格反差很大,故處理時分外小心,因若有丁點偏差,便會引來反效果。

為驚喜床上戲保密



雖然於觀眾眼中,她的角色是破壞別人婚姻的壞女人,但Moon卻有另類看法:「冇女仔想做『小三』,角色係悲劇人物,佢嘅情緒變化好大同好複雜,算係我入行以來最大挑戰嘅角色。」對於首集便與Bosco有火辣床上戲,Moon坦言為帶來驚喜,事前未有告知任何人,包括至愛的母親,而自己亦從未看過剪輯後效果:「希望可以呈現到一個好立體嘅人出嚟,唔好只睇佢表面點誘惑人。」

身體響警號學會調整心態



回憶拍攝期間因壓力太大,而令身體響起警號,成身皮膚敏感兼面部生玫瑰挫瘡,於高清鏡頭拍攝下,面上粒粒無所遁形,令Moon心情跌落谷底,更差點患上抑鬱:「要去handle角色已經唔易,皮膚呢啲冇得急,冇諗過只係想努力做角色,反而令自己更大壓力。嗰時試過西藥,食完有更加多嘢發出嚟,醫生有講要我慢慢調節,因為我免疫系統已經collapse(崩潰),再唔調整嘅話,對我情緒都唔好,心諗點會咁?唔想咁引致抑鬱初期,影響我嘅人生。」當警覺問題所在,Moon開始與家人、經理人及朋友等傾談,以坦誠的心面對病情:「係呢個角色令我有壓力同緊張,我好想做得好同有轉變,令大家接受到。希望比預期再做得好啲,係幾矛盾,要喺工作同身體拎平衡。好在身邊人好關心同諒解我,好似Bosco會同我分析角色,教我應該點,而自己都慢慢調整到步伐,拍到後段就適應到,今次令我明白好多嘢要一路做住嚟學,學住嚟試。」

笑容散發感染力



談到於芸芸小花當中,Moon絕非sell靚女形象,但仍獲觀眾愛戴,她不諱言現今觀眾很聰明,不只容納有樣貌的演員:「難聽啲講,靚嘅女仔可以做一個花瓶,花瓶同演員都各有各好,但做一個靚花瓶都唔係好事,慶幸觀眾緣同我距離好近。(網友讚你嬲得可愛!)都幾搞笑,有趣係觀眾唔會一直睇正氣角色。(覺得自己係花瓶?)唔係,靚唔靚對觀眾唔係一定。(唔需要靠樣冇咁大包袱?)咁選得港姐都唔太差,我都冇乜包袱。(咁你有乜特質?)鍾意笑,有感染力,同由心出發囉!」

真命天子要愛錫父母



入行三年的她一直單身,雖然偶有緋聞對象出現,但到最後都不了了之,直至早前拍攝劇集《城寨英雄》時與「打星」伍允龍演情侶,二人戲中感情伸延至現實,惟雙方一直不肯承認戀情,僅承認是好朋友。一提起伍允龍,Moon總是哈哈大笑,隱藏不了其內心喜悅:「佢係一個好好朋友、好男仔,同佢依家係好朋友,其他嘢冇話點諗,順其自然!(少少過電都冇?)戲外暫時冇,令大家失望,我哋兩個都好活潑,一齊就會講笑,呢個感覺非常開心。(有冇其他感情?)未知未來係點,但呢刻朋友關係非常之好。」問到入行以來可有想發展的對象出現過?Moon坦言有遇過有好感的異性,但卻未有一個能毫無保留相處,故她會等待,更笑說:「揀男友會隨年齡不停咁變,以前要好孝順、有幽默感同上進心,但依家愈來愈將屋企擺到好前,我好錫父母,好想對方都係咁先係合適伴侶。」

文:影視組

攝影:吳文聰

化妝及髮型:AngelaShum

服裝:b+ab

贊助商:

討論:
分享: