中環出更:梁耀忠臨急學手語 爭列官方語言


2017-01-06 07:00

跟蹤提及過的人和物:

上一則新聞: 中環出更:李秀恒遊內蒙 凍到着三條褲

 

立法會下周三開會,立法會議員梁耀忠(阿忠)就喺當日會議提出咗題為「爭取手語成為香港官方語言」嘅無法律約束力議員議案,佢仲喺社交網站預告添!不過呢個議案係為聾人爭取權益,阿忠發言聽障人士會唔會唔知阿忠講乜o架?於是阿忠就臨急抱佛腳學咗一句手語,意思就係「爭取香港手語成為官方語言」,更呼籲大家一齊學習呢個手語,支持聾人融入社會。

未知約邊位官員商討



阿忠前晚同聾人團體會面,一齊討論佢下周三提出嘅議案同相關事宜,以及未來有啲乜嘢行動,期間阿忠更同團體成員一齊拍攝短片,呼籲大家支持手語成為官方語言。不過,片段中唔識手語嘅阿忠就未能同大家一齊以手語嗌口號表達訴求。

事後阿忠就喺社交網站上載其個人做手語嘅短片,話係前晚會面時向聾人團體學嘅。雖然係事後「補飛」,但都尚算做得有板有眼。阿忠又話嚟緊周三會同聾人團體喺立法會外請願,之後亦會同團體約見官員商討將手語定為官方語言事宜。至於被問到約見邊個決策局官員,阿忠話佢都唔知,要睇吓下周三邊位官員出席立法會先知邊個負責喎。

卓妮

贊助商:

討論:
分享: