周星馳畀柚玩殘變茄喱啡!


2017-01-23 07:00
上一則新聞: 阿倫探完劉德華:佢唔講得…笑!

 

「周星馳」向來都是電影票房與賣埠保證,不過時移世易,星爺近日為宣傳自己監製、徐克執導、小鮮肉吳亦凡主演的新片,毅然殺落油麻地果欄,以一招派西柚來宣傳《西遊》,結果現場大批女Fans追着吳亦凡大叫:「我想攞你籮柚」,相比之下,被冷落一旁的星爺,就似《喜劇之王》入面個死茄喱啡尹天仇一樣,恍如搭枱靠邊站!自從同于文鳳分手之後,星爺已經同緋聞絕緣,加上咁嘅場面,搞到佢成樽女人毒藥咁款。

計我Nuts哥話呢,本來果欄一役,星爺唔使輸得咁難睇,被吳亦凡班瘋狂女Fans,搞到自己好似冇Fans咁。錯就錯在星爺近年一反自己傳統,唔再好似以前咁,開戲捧出莫文蔚、黃聖依、張雨綺,甚至反串女扮男裝嘅徐嬌等星女郎,改為捧《西遊.降魔篇》文章同羅志祥、《美人魚》鄧超、《西遊伏妖篇》吳亦凡等男星,呢班男人一個比一個青靚白淨,反觀星爺呢?佢憂鬱嘅眼神、唏噓嘅鬚根,加埋一頭灰白交錯嘅亂髮,你叫睇韓劇成長,被韓流花美男催眠嘅新一代,點可能唔當你大叔咁嚟看待呀?!

梁思浩死兩次老竇



星爺作為電影監製,連佢自己都語帶不屑咁話:「《西遊》送西柚,都唔知邊個諗出嚟?啲『咁好嘅橋』點會係我諗出嚟!」咪就係!唐僧取西經,歷經九九八十一難,「《西遊》送西柚」,則可以話係爛中之爛!唔通星爺下次拍《三國演義》,就拉大隊落柯士甸道三角公廁義演咩?以周星馳嘅標準,以上啲咁嘅食字Gag,仲有好大進步空間囉!

星爺咁都Pass呢條宣傳橋,一定另有原因,講到識計數,周監製直頭係哈佛劍橋雙碩士學位!佢喺《食神》入面都話:「張枱有咁窄得咁窄,張櫈有咁逼得咁逼,咪等啲友坐得咁舒服,食完嗱嗱聲好走!啲飲管有咁粗得咁粗,冰有咁大舊放咁大舊,杯汽水咪『雀』聲飲完,買過第二杯囉!你係咪新嚟,呢啲都要我教?」完全睇到周氏管理學嘅精髓。

田雞收T恤要嘔凸



又睇吓同佢合作多年嘅田啟文(田雞),當年講番同星爺相識十幾年,只收過一件價值二百元嘅T恤,星爺兜個彎要田啟文出錢代佢買咗十幾張戲飛,埋單計數田啟文仲要嘔凸!又好似黃一飛拍《少林足球》嗰陣,要重複又重複咁畀人爆道具樽,滋味會係點?又或者梁思浩拍《國產凌凌漆》嗰陣,星爺要佢「死過老竇未呀?死老竇咁喊畀我睇,死兩次嗰隻呀!」結果思浩由朝早十點聲嘶力竭喊到凌晨五點,但原來除咗第一Take外,其餘係根本冇Roll機拍!「鍾意點就點,呢啲就係power喇!」所以話星爺點會咁順攤?!

喂,你去間餐廳,發覺啲嘢食唔得,咁點呀?食氣氛囉!氣氛唔得呢?食服務囉!咁宣傳條橋唔得,人哋梗係射歪落個小鮮肉吳亦凡度,正如「古時有關雲長全神貫注捉象棋刮骨療毒,今日有我凌凌漆聚精會神睇鹹帶鑿骨攞彈頭」,呢招叫轉移視線分心大法!

或者捧女星對星爺嚟講已經冇難度,所以近年轉捧男星,但到暫時呢一刻睇嚟,星爺捧男星既不可「攞人籮柚」,亦不可令自己受到女Fans夾道歡迎,有嘅只係令自己變得透明,實在仲有好大進步空間囉!但係唔緊要,因為「勤力上進莫氣餒,衰咗飲樽礦泉水」係星爺一路嘅座右銘。星爺,飲杯先啦,衰鬼!

贊助商:

討論:
分享: