中環出更:橫額寫錯名 陳克勤賴運程


2017-01-27 07:00

跟蹤提及過的人和物:

上一則新聞: 中環出更:三老鴿 李卓人 與漢奸黎團年

 

早幾日都講過,民建聯(民記)嘅陳克勤(克勤,圖)被揭發賀年橫額寫錯自己個名為陳克「勸」,遭外界嘲諷。克勤日前就化身堪輿學家「民師傅」為自己平反,話橫額出事當日(二十四日)係年廿七,係屬龍嘅佢喺猴年最黑嘅一日,牙痛、被車撞、橫額寫錯名同失眠一Take過,似乎係將橫額錯名嘅責任推卸係運程所致喎。

化身「民師傅」解畫



克勤喺facebook上載咗一幅圖,圖係佢本人分身飾演嘅民師傅,指年廿七當日朋友「陳先生」一過凌晨十二點就開始牙痛,痛到失眠結果只係瞓得三粒鐘,之後趕去立法會開會四個鐘,先可以搵醫生剝牙;其後陳先生揸車期間又無辜被撞,慶幸人無受傷。

而當日最黑仔嘅,自然係陳先生嘅橫額寫錯自己個名,但民師傅就話出錯涉及運勢,屬「無妄之災」。講白啲,即係將出錯責任歸咎係運程囉!最後,民師傅相當樂觀,認為陳先生喺新嘅一年會「否極泰來」,雞年行大運添!

卓妮

_

贊助商:

討論:
分享: