傳Bob拜年醉酒鬧事 謝安琪:幫我踩旺個場!


2017-02-10 07:00
上一則新聞: 森美派「空心利是」被追債

 

林盛斌(Bob)新年期間偕蕭正楠、黃翠如、方力申及周柏豪等,到張繼聰及謝安琪(Kay)家中團拜,Bob事後在網上自爆曾醉酒斷片,有傳他當晚醉爆爆粗又強吻友人,激到大肚的阿Kay扯火!Kay昨日受訪時替Bob伸冤,她說:「梗係冇啦!千祈唔好屈阿Bob,我哋好愛佢。」並笑指Bob當晚雖然飲醉,但仍帶給大家不少歡樂:「佢講嘢大大聲,新年流流好響,幫我踩旺個場!」她又透露Bob當晚確實留到最後才離開,待酒氣散了更與她及阿聰討論小朋友讀書事宜,又說:「佢突然間仲好肚餓,老爺煮咗3個河粉畀佢食!」當晚同樣在場的黃翠如則說:「Bob好乖,佢哋有喺度傾人生道理。」

對於被指醉酒失儀,Bob回覆:「梗係冇咁嘅事啦!我哋成班聚吓,現場最嘈係我,但冇搞任何嘢亦有傳打爛嘢,都係放鬆吓啫!大家道別後仲再約下次上去(Kay家)再聚!」

贊助商:

討論:
分享: