政情:故宮館諮詢加展板 陳淑莊揶揄:好豐富


2017-02-16 07:00

跟蹤提及過的人和物:

上一則新聞: 政情:險燒屋留陰影吳永嘉廿年無下廚

 

政府喺未經公眾諮詢下,突然宣布於西九文化區興建故宮文化博物館,備受社會各界抨擊。西九文化區管理局日前決定延長公眾諮詢期兼會提供新資訊,立法會監察西九文化區計劃委員會副主席陳淑莊尋日再到中環嘅諮詢場地觀察,批評新增展板只係裝飾性資料,仲嘲諷係整色整水。

「加顏色就係新資料?」



西九管理局日前召開會議,決定延長有關公眾諮詢兩周至三月八日,而諮詢場地嘅展板亦增多四塊,陳淑莊睇過之後,就語帶嘲諷,指內容「好豐富」。佢話新增嘅展板內容講解咗設計概念由來,以及建築物各層嘅平面設計,但佢認為都係裝飾性資料,仲質疑點解要分階段發布,因前政務司司長林鄭月娥喺舊年十二月二十三日到北京商討項目時所播放嘅幻燈片,已有展示分層平面設計,同依家嘅新展板分別唔大,反問:「加咗顏色就係新資料?」

佢又批評由第一日假諮詢開始,政府就已嘗試降低故宮館設計顧問嚴迅奇嘅參與度,所以逐步發放資料,但其實最重要嘅係問市民應唔應該興建故宮館。

贊助商:

討論:
分享: