政情:痛風發作 徐立之涼鞋襯西裝


2017-02-27 07:00

跟蹤提及過的人和物:

上一則新聞: 政情:主席變理事 鄧飛跌鑊甘

 

卸任香港大學校長近三年嘅徐立之,尋日以港科院院長身份出席一個講座,向教育界人士分享佢喺科學教育同大學管治嘅經驗,但係上台時佢不慎「窒一窒」腳,差啲跌倒,跟住自己亦爆出一句「差啲出事!」之後佢向在場人士透露,因為自己食得太好,所以痛風發作。

食得太多生蠔出事



究竟食咗啲乜?徐立之之後向傳媒透露,上星期三佢應舊生邀請到賽馬會敍舊,但學生們準備咗過多美食,眼見枱上剩下大量生蠔,佢本住唔好浪費嘅心態食晒剩餘嘅生蠔,最終搞到痛風發作,所以尋日要着涼鞋配襯筆直嘅西裝,減低腳部所受嘅壓力。

原來徐立之喺十年前參加十公里馬拉松賽時已經發現有痛風,之後就開始戒口,再冇飲啤酒同食露筍。問到佢之前係咪最鍾意飲德國啤時,佢突然大笑起來,但就冇回答問題。

自爆中學默書常「捧蛋」



講番個講座,徐立之喺台上被問到本港嘅考試制度時,曾一度指自己喺背誦式嘅教育制度下從來都吃虧,坦言自己冇辦法改變呢套制度。佢之後向傳媒表示,自己記性唔好,中學時中文默書好多時都食「零雞蛋」,但自己嘅英文發音就唔錯,最後被老師推薦參加英文朗誦比賽,但係自己背唔到文章,最終出醜收場,事後回想先發現自己只能夠「照住讀」。

_

贊助商:

討論:
分享: