政情:非遺舌戰 許曉暉拒粵界邵家臻發爛渣


2017-02-28 07:00

跟蹤提及過的人和物:

上一則新聞: 中環出更:示威停不了 斥漢奸黎反中亂港

 

近年社會觸發「粵普」之爭,即係講粵語定普通話,就連粵語定係普通話教學都惹起好大爭議,好似尋日喺立法會一個事務委員會上,社會福利界嘅議員邵家臻就建議將廣東話納入「香港非物質文化遺產代表作名錄」,遭民政事務局副局長許曉暉質疑,邵家臻隨即發爛渣。

另十項國家級非遺入選



政府正就「香港非物質文化遺產代表作名錄」嘅草擬名單進行諮詢,政府建議嘅本港首份非遺代表作名錄包括廿個項目,而包括南音、宗族春秋二祭、香港天后誕、中秋節——薄扶林舞火龍、港式奶茶製作技藝、紮作技藝、香港中式長衫同裙褂製作技藝等十個建議項目則在諮詢之列,而已列入「國家級非遺代表性項目名錄」嘅另外十項,包括粵劇同涼茶等將自動被納入,正式名錄預料喺今年中公布。

究竟乜嘢先應該列入名錄之內?立法會民政事務委員會尋日開會討論草擬名單,邵家臻建議將廣東話一併納入,但係許曉暉就質疑廣東話每日都喺度傳承緊,邵家臻聽到即刻好唔高興,唔單止反批呢種講法唔合理,更即時指舞火龍同涼茶都毋須列入非物質文化遺產,仲戲謔「日日都可以煲涼茶!」老實講,邵家臻自己提出嘅建議,人哋唔啱聽或不被接納,佢就否定晒其他嘢嘅價值,似發爛渣多啲喎。

議員倡立法護文化遺產



再講,由於政府建議將盆菜同裙褂技藝等十項非物質文化遺產,列入香港代表作名錄,為分配資源保護文化遺產提供參考。議員陳淑莊亦喺會議上關注政府會唔會倣效內地同台灣咁,就保護文化遺產立法,特別提到裙褂技藝嘅承傳方面,許曉暉則坦承社會對裙褂嘅需求不如往昔,保留有一定嘅難度,所以暫時無意立法,但佢認為最佳方法係與唔同嘅團體合作傳承。委員會主席馬逢國則建議政府與旅遊發展局合作推動,包括針對部分項目闢設文化村。

贊助商:

討論:
分享: