任達華衝上台 影曹星如勝利一刻


2017-03-13 07:00
上一則新聞: 湊B責任大 樂基兒:冇諗住生!

 

「神奇小子」曹星如擊敗日本拳手向井寛史,成功贏得21連勝,創造神話!除了成為體壇盛事外,更令一班藝人為之瘋狂!有份在現場睇比賽的任達華除了肉緊打氣外,更為對方拍下花絮照。而Rex在比賽前獲得狄龍送上利是作鼓勵,相信令他如有神助。

曹星如(Rex)前晚發揮永不放棄精神,取得最後勝利,令娛樂圈不少藝人為之瘋狂,李克勤、鄭裕玲、谷德昭、張達明、郭偉亮夫婦等都到場見證Rex再次獲得冠軍,紛紛到後台與拳王合照!

甄子丹傳短訊恭賀



有份見證歷史時刻的任達華,近日雖忙於籌備攝影集《ILoveHK》,但仍特別抽空到場支持Rex,更有幸上擂台與Rex合照,拍下不少花絮相,希望可以將相片放在攝影集中。

任達華說:「覺得好震撼同好感動,現場有好多歡呼聲,香港精神返晒嚟!但今次要一心二用,既要睇比賽,又要影相。睇見曹星如被人打嗰陣,我都睇到好緊張,同埋我影嗰啲相,我係問過曹星如嗰邊,係可以放喺我嘅攝影集當中,佢哋都同意咗。」

「宇宙最強」甄子丹獲悉Rex21連勝後,即時用英文傳短訊給對方經理人Jay。他表示雖未能到場為Rex打氣,但精神與他同在:「Jay,再次恭喜曹星如取得偉大勝利,因為我去緊大陸,唔可以喺現場為阿Rex打氣,但我嘅精神係同你哋同步。」之後更說:「恭賀我們的世界拳王!Rex,你是香港之光!」

阿倫阿叻睇直播打氣



同樣未有在現場睇比賽的譚詠麟(阿倫)及陳百祥,雖然身在外地滑雪,但仍透過直播欣賞及為Rex打氣,阿倫留言:「曹星如話香港人我畀晒你呀!拳王星好勁!」

除了眾星打氣外,其實Rex今次成功,狄龍的一封充滿愛的利是都功不可沒,皆因寫上「勝利雙手創」的利是令Rex憶起已過身的爸爸!Rex在社交網留言:「自從曹爸爸過身後,比賽前就冇收過利是了,但今次比賽前,狄龍大哥突然畀咗封利是我,當時我有點兒受寵若驚,我真係好感動同好感觸。」他坦言似找回爸爸的感覺,更寄語大家要珍惜身邊每個人,特別是親人。

此外,謝天華、蕭正楠、林保怡、余文樂及張繼聰等亦在網上為Rex送祝福,及為他感到驕傲。



採:影視組

文:專案組

贊助商:

討論:
分享: