中環出更:駱淑芳獲頒博士 史泰祖撐場話當年


2017-03-15 07:00

跟蹤提及過的人和物:

上一則新聞: 綠色先鋒:牆上種菜 足不出戶嘗鮮味

 

香港大學尋日頒授名譽博士學位畀三位傑出人士,分別係國際著名肝臟研究專家駱淑芳(Anna)、從事特殊教育工作嘅鮑瑞美,同埋企業家李達三。佢哋獲得唔少親朋好友到場祝賀,其中醫學會前會長史泰祖都有份出席,更分享同其中一位博士學位領受人嘅往事。

史泰祖話當年入讀大學時生活過於多姿多采,搞到第二年已經要留班,但就因此同Anna成為同班同學。佢回想番當年留班,形容為佢人生低潮,好彩得到Anna嘅詳盡筆記令佢渡過難關。雖然呢件事距今四十年,但佢仲好記得Anna手字工整到似電腦打字,而Anna都話史泰祖曾經親口多謝佢添!

陳以誠曾組Band玩音樂



醫學會副會長陳以誠都係Anna嘅同班同學,佢大讚Anna有號召力,所以今年同學聚會特別多人報名出席。其後佢更自爆當年經常走堂,好彩毋須留班,但就同史泰祖一樣要借同學筆記溫習,但偏偏冇問Anna借,笑稱借咗成績可能會唔同。而經常唱兒歌嘅陳以誠,其實喺大學已經有玩音樂,當年更與同學合組樂隊添,但當時唱歌主要為團契,喺九十年代有兒童節目出現,先有機會改唱兒歌啫。

Anna得到唔少舊同學撐場,而鮑瑞美就有多位舊學生為佢慶祝,因為佢由十八歲半已經從事聽障兒童教育工作,真係桃李滿門。

鮑瑞美教導聽障兒童並非用手語,而係用口語同佢哋溝通,因為聽障兒童能夠以讀唇方式同埋僅餘聽力去理解其他人嘅說話,有助佢哋融入社會。鮑瑞美更話教育聽障人士得到嘅成就感非常大,係其他工作無法畀到。難怪佢可以醉心呢方面工作咁多年喇!

卓妮

贊助商:

討論:
分享: