不增泊位增罰款 政策離地惹民怨


2017-03-21 07:00

跟蹤提及過的人和物:


上一則新聞: 垃圾徵費已來遲 配套更是大問題

 

香港地樓價高處未算高,「上車難」成為無殼蝸牛揮之不去的痛,但對於搵食車司機大佬嚟講,香港地泊車位長期不足,搵位泊車分分鐘同上車一樣咁艱難。

尋日之嘛,有運輸業團體揸住幾十部唔同類型商用車輛,殺上政府總部門外請願,佢哋不滿當局缺乏長期規劃,喺冇足夠泊車位供應下,企圖以增加牛肉乾罰款阻遏違泊,認為咁樣本末倒置,唔單止無助解決問題,只會引發停車場加價等連鎖反應;又警告如果當局一意孤行,唔排除將行動升級喎。

又難怪業界咁(興)嘅。有學童車司機大吐苦水,話因為冇專用車位而經常被抄牌,食一張牛肉乾一日當堂白做,食兩張直頭要倒貼,都咪話唔陰功。

冇錯,香港地車多路窄,大型貨車停晒喺路邊上落貨搞到大塞車,又的確幾擾民,加強檢控違泊無可厚非,問題係有頭髮冇人想做瘌痢,有咪錶位司機大佬又點會亂咁泊車,你估收告票好過癮咩。再講吖,增加違泊罰款只會加重搵食車司機負擔,對有錢私家車主嚟講,阻嚇力大極有限。大家有眼見,警方耐唔時都會嚴打違泊,每次閒閒地派幾萬張告票,結果一陣風過後,好快就故態復萌,證明獨沽一味增加罰款,除咗趕絕搵食車司機,根本無濟於事。

話時話,紐約、東京、新加坡等大城市同香港一樣面對車位不足問題,但人哋政府靈活變通,透過興建機械式多層停車場,以及利用互聯網先進科技進行配對等,多管齊下解決問題,好多地方都做到一輛汽車配備一點二至一點四個泊車位。反觀港府,九五年完成《泊車位需求研究》報告後,要去到十幾年後至再作更新,期間仲不斷減少新落成建築物車位比例,特別係商用車位,隨着當局近年相繼收回市區露天停車場,違泊咪愈來愈嚴重囉。

鬼咩,負責決策嘅高官坐喺冷氣房裏面,出入有專人專車接送,根本唔會理解司機大佬搵位泊嗰種閉翳,閉門造車就耍家,旨意佢哋閉門造車位,盞嘥心機捱眼瞓。尋日有位參與遊行嘅垃圾車司機話喎,繼續畀人抄牌遲早劈炮唔撈,到時冇人倒垃圾,高官自己揸垃圾車搞掂佢啦!計功夫茶話齋,香港高官出名離地,就講下屆特首參選人吖,有人買卷廁紙都唔知碇,有人唔知一盒粟米斑腩飯幾多錢,就算邊個上台都好,都冇可能了解民生疾苦,制訂貼地政策喇。

冇符喇,港府推出政策高官拍拍腦袋就算,結果次次都搞到一鑊泡,民怨咪咁樣嚟嘅囉!

贊助商:

討論:
分享: