謝安琪產後出院 張繼聰愛的宣言:我餘生都係照顧佢哋


2017-03-27 15:32

跟蹤提及過的人和物:

上一則新聞: 我們都可以是朋友!《芝麻街》引入自閉症兒童新角色

 

歌手 謝安琪 (Kay) 上星期四在沙田仁安醫院剖腹誕下7磅半B女,B女取名張靖,英文名則為Karina。再為人父的張繼聰今日上午帶埋囝囝張瞻,到醫院接老婆及女兒出院,一家四口以黑色打扮型爆亮相,連Karina都變埋潮B!另外阿聰接受訪問時真情流露,話為咗屋企人,自己幾辛苦都係值得:「我餘生都係照顧佢哋!」 阿Kay聽到一定冧到暈!

延伸閱讀:

《深宮計》收買人命 監製錫晒周秀娜劉心悠

謝安琪開刀誕7磅半B女 取名張靖Karina

現年40歲的阿Kay去年宣布暫別樂壇,終於造人成功再陀B女,湊成個「好」字!上星期四下午阿聰在沙田仁安醫院門外現身,宣布太太剖腹誕下7磅半B女。阿聰今次有陪太太入手術室開刀,B女出世後亦有幫手剪臍帶,不過就剪咗三次先成功!

透露已經為女兒改名,中文名叫張靖,英文名則為Karina。中文名係因為張氏夫婦都鍾意呢個「靖」字,有恬靜、安靜的意思。阿聰又笑指女兒的英文名本來另有打算,不過有一晚佢發夢時見到一個可愛小女孩,小女孩話希望自己叫「Karina」,因為想和媽媽英文名「Kay」的頭兩個英文字一樣。既然女兒報夢選擇自己英文名,阿聰當然贊成!

 

今日中午約12時,阿聰一家四口離開醫院,眾人相當合作,企定定讓傳媒拍照。化了淡妝的Kay產後首度曝光,面色紅潤,精神似乎不俗,不過水腫依然未退。張氏一家四口都係以黑色打扮型爆亮相,就連在阿聰懷中熟睡的Karina都搖身一變做潮爆B女,一身黑金色Hip Hop裝束,頭戴一頂有金色蝴蝶結的帽仔,有型又可愛,而且跟哥哥張瞻的造型襯到絕!

  

 

被問到是否會抽更多時間照顧家人,阿聰非常有承擔:「我嘅餘生都係照顧佢哋!」佢坦言現階段非常忙碌,仲有好多事情要處理,依家每日都只係瞓兩個鐘頭。雖然係辛苦,但阿聰表示太太阿Kay開刀生B及餵母乳辛苦,所以就算忙拍劇都會盡量抽時間照顧太太!佢又稱自己好似新手爸爸一樣手忙腳亂,幸好有很多人幫忙。

 

而為免影響張瞻與妹妹Karina的兄妹情,阿聰在女兒出世時亦有送禮物俾哥哥,而且佢一早提醒身邊親友唔好只顧讚女兒可愛而忽略了兒子。阿聰又大讚兒子抱妹妹時非常溫柔,自己覺得老懷安慰!

 

阿Kay被問到傷口仲痛唔痛,佢就笑笑口表示:「康復情況OK,冇問題,多謝你哋!」之後一家四口登上七人車離開醫院。上到車後Karina就由媽媽阿Kay親自抱番,張瞻仲忍唔住摸摸妹妹面珠㖭!

全文完

延伸閱讀:

陳展鵬偷戀落選港姐 胡定欣怨上錯賊船

贊助商:

討論:
分享: