Kay同囡囡出院喇!張繼聰餘生都照顧佢哋


2017-03-28 07:00

跟蹤提及過的人和物:

上一則新聞: 天王戀事多

 

歌手謝安琪日前誕下囡囡Karina,湊成「好」字,昨日由老公張繼聰及大仔張瞻陪同出院,主動推着BB車的張瞻,與妹妹均是黑色HipHop打扮,襯到絕!曾擔心囝囝呷醋的阿聰,爆囝囝收到妹妹送的禮物後即「戲王」上身說:「妹妹真係全世界最好嘅公主!」

40歲的歌手謝安琪(Kay)上星期四(23日)在仁安醫院剖腹誕下囡囡張靖(Karina),留院4晚後於昨日上午出院,在老公張繼聰及9歲大仔張瞻陪同下返家坐月。一家四口離開醫院時,阿聰抱着Karina,張瞻乖巧地推着BB車,而Karina則一身HipHop衫仔,與哥哥襯到絕!現場所見,化上淡妝的Kay依然靚爆,皮膚白滑之餘更面尖尖,問到傷口是否還痛,她說:「唔痛,冇問題,多謝你哋!」

張瞻柔情氹妹



阿聰接老婆前先獨自受訪,問到Karina似邊個,他笑指兩公婆都覺得似張瞻:「一出世同我個仔細個一樣樣,當然我希望似媽咪,冇乜就千祈唔好似我!」阿聰曾擔心囝囝呷醋,但見到他對妹妹呵護備至即老懷安慰:「我個仔抱住個女好溫柔,初初好擔心佢會對妹妹點呢!但睇到佢好柔情,譬如佢抱住阿妹,阿妹喊,我未見過阿仔咁溫柔咁叫妹妹唔好喊,話哥哥喺度。」他更自爆用囡囡的利是錢買足球球星卡Boxset送給張瞻,想不到張瞻收到禮物後即「交戲」,阿聰笑說:「佢話『妹妹真係全世界最好嘅公主!』,依家佢見到妹妹會好開心,希望兩兄妹感情會好,見到一個BB抱另一個再細啲嘅BB,感覺好糾結,唔係好想返工!」

短期內無意復工



問到會否抽更多時間照顧家人,阿聰即高呼「愛的宣言」:「我餘生都係照顧佢哋!」至於是否努力賺錢,讓太太繼續停工?他揚言賺錢跟Kay停工沒有直接關係,日後都會繼續努力,又爆太太暫不想工作:「佢話望住個女真係咩都諗唔到,短期內太太都係主力湊小朋友。」至於Kay的康復進度,他說:「我係佢人肉拐杖,因為佢行路唔方便,上落床都要人扶,之前練練埋埋啲肌肉就喺度用,要畀佢枕住、扶吓佢,全副心機照顧佢!」而昨日傍晚,阿聰上載張瞻嘟長嘴仔錫妹妹的照片,非常溫馨!

文:音樂組

攝:司徒國榮

贊助商:

討論:
分享: