中環出更:做行會召集人 陳智思要睇時間


2017-04-01 07:00

跟蹤提及過的人和物:

上一則新聞: 中環出更:教界領袖論訓練營有讚有彈

 

行政會議成員陳智思(Bernard)公職多多,有埋「公職王」稱號,不過佢同時又要打理家族生意,咁多嘢要做,唔通Bernard識分身術?Bernard尋日出席哥哥陳智文嘅畫展時就話,好彩有大哥「出手擋」,幫手處理吓啲家族生意,等佢可以減輕工作量。

家族生意靠大哥幫手



陳智文就話,其實自己都唔係幫得好多,事關佢地喺處理家族生意上有分工,佢原本負責銀行業務,而Bernard就負責保險業務。大約十年前,佢哋賣咗銀行業務後,多咗人手先可以幫手睇住保險業務,所以佢都係幫得就幫。佢仲話,Bernard做立法會議員嘅時候最忙,依家雖然Bernard都仲有做公職,但已經冇咁忙嘞!

Bernard早排幫候任特首林鄭月娥做競選辦主任,坊間一度傳緊佢會出任下屆政府嘅行會召集人。佢就話,之前已同林鄭講過自己冇乜時間,唔會做問責官員,仲透露話對方暫時都仲未搵佢傾。對於會唔會做行會召集人,佢就話要睇下未來嘅時間安排,同埋林鄭對下屆行政會議嘅期望再作決定。

卓妮

贊助商:

討論:
分享: