王君馨 鍾舒漫平衡節奏無懈可擊


2017-04-03 07:00

跟蹤提及過的人和物:

上一則新聞: 高飛4月22日設靈

 

王君馨與鍾舒漫最近推出跳舞快歌,明言要「做自己」。二人雖然認識多年,卻從未一起真正工作,籌備新歌時矛盾爆發,皆因鍾舒漫人如其名鍾舒「慢」,王君馨則夠「輕」快,幸而她們互補不足,學懂欣賞對方的優點。

鍾舒漫與王君馨相識近10年,一個在樂壇打滾多年,另一個則在電視圈打出名堂,雖然工作範疇不同,兩人私底下卻十分老友,近日更推出合唱跳舞快歌《隱型》,傳達「做自己所想」的訊息。她們為了這個「BB」,由零開始一手一腳親自策劃,連服裝及排舞師等細節亦絕不假手於人,但這對認識了近10年的朋友,原來相處時亦有矛盾。

王:王君馨鍾:鍾舒漫

鍾:其實我哋識咗咁耐都冇真正一齊做過嘢,就算係同個妹(鍾舒祺)做嘢,都有好多矛盾位。今次我同王君馨呢個Project,大家成日都要見同傾,好多嘢要面對同解決,就會睇到兩個人有唔同。我哋有一點係幾清晰嘅,我人如其名,叫鍾舒「慢」,真係比較慢啲!

王:我係王君馨,係「輕」快啲嘅!

鍾:我會慢慢唔出聲住,或者去到最尾先出聲,因為我係要去到最尾,睇埋結果係點嘅人。

王:你係會接受咗先,呢一點我係欣賞嘅!你會諗吓先,鍾唔鍾意都會欣賞咗先,無論係排舞定服裝,你會諗一諗先。但我呢?我覺得有問題就要早講,如果唔係人哋Firm晒先話「我覺得咁樣都唔係咁好。」覺得會浪費時間,因為可能係無綫文化,大家都好急,所以有咩大問題就要即刻講先,啲小問題自己解決到就解決咗佢!

鍾:反而我覺得今次幾好,大家有個互補咁。有時我遷就環境同個人,或者想理解嗰個人嘅狀況,可能呢個係人哋嘅最盡呢?如果係你,你會覺得大家有時間,叫對方畀多個最好嘅版本我哋。咁好啦,我就即管再試啦,又真係得o架喎!

王:我都覺得進步咗好多,好多時我一發現有問題就會同你講,但依家會問你睇唔睇到個問題先,如果睇唔到就會學你欣賞吓先,諗多一陣,會唔會聽日就接受到呢?以前可能就會直接講多啲。之前臨尾嗰幾個月,我一發現問題會同你傾咗先,有時大家意見一致咪改囉,但有時意見相反,好似畫面會亂,燈光會怪怪哋,喺呢個時候我哋會將問題交畀第三者,例如導演同其他人做決定。

鍾:好開心同你做呢個Project,因為朋友嚟講,我哋關係會有一大進步,Morethan姊妹,係姊妹中嘅姊妹!

王:有時我見你發光發亮,我會提點自己要同你講,你一聽到某啲音樂,唔需要我提點就會自然興奮。

藝術家情人你Like我唔Like



做朋友的通常臭味相投,才能成為真正知己,但談及感情世界,兩人喜歡的對象卻大有不同。

王:我個人急啲躁啲,藝術家真係唔啱我!

鍾:你會忟囉,你應該會鬧「你諗緊乜呀?你講緊乜呀?」

王:係呀!如果要日日生活,我未必跟到一個藝術家囉!有時藝術家係唔MakeSense,我覺得同呢啲人做到朋友,但一生一世呢,明明遲到但仲話個蛋煮得唔係幾好,其實都遲到啦,仲講?快啲食啦!

鍾:不過,其實我幾欣賞呢啲人嘅,我會覺得呢個人有啲嘢!我都知道趕時間,但會開心地趕時間,會甜笑然後叫佢快啲走。

王:我係大女人少少嘅,自己好獨立,5歲嗰陣係自己返學校,如果有咩奇怪嘅人要保護自己,但依家想Relax啲。

鍾:我又唔係完全小鳥依人,我都好獨立,去到某啲位都唔識叫幫忙。我以前嘅愛情係有問題都唔識得去講,好避忌指出對方嘅問題,唔想人受傷,但份人又唔夠直接,所以會用好多兜彎嘅方法等佢知道,但有時對方都唔會知。

後記:襯到絕!



王君馨與鍾舒漫一見面即雞啄唔斷,不論是影相還是受訪,講唔夠3句立即哈哈大笑!她們為了準備是次訪問,事前專誠襯色襯衫,十足孖公仔!

文:林倩怡

攝:吳文聰

鍾舒漫化妝:Zoefan

鍾舒漫髮型:KaviYeung@FifthSalon

王君馨化妝:PhoebeYung

王君馨髮型:Jay@Hair

場地:老北京(銅鑼灣)

服裝:Sly

鳴謝:Barry@J&BEnt

贊助商:

討論:
分享: