政情:十年副局許曉暉邱誠武等升正?


2017-04-04 07:00
上一則新聞: 中環出更:梁繼昌搭車夾傷 手指公狂流血

 

隨着特首選舉嘅結束,政圈最關心就係下屆政府班子。不過,候任特首林鄭月娥早前就話,發噩夢未能趕及喺七一宣誓時埋班,反映佢難以吸納政府以外嘅人入「熱廚房」,既然搵唔到人,外界估計佢可能要喺現屆嘅副局長埋手。其實民政事務局副局長許曉暉同運輸及房屋局局長邱誠武(邱副)都做咗近十年,係咪有機會升呢?

除咗林鄭因組班問題發噩夢,曾任林鄭競選辦主任嘅陳智思都講過組班困難,因為加入政府猶如「求人入火海」。佢更提倡晉升副局長,表明現屆政府有唔少副局長能夠勝任,所以將來出現大批副局長齊齊升呢,並非無可能發生。

喺五年前、即特首梁振英提出五司十四局嘅重組架構方案,當中包括成立文化局,而長期處理文化政策嘅許曉暉,當時更係局長熱門人選添!可惜,重組架構方案喺泛民拉布拖垮咗,令許曉暉升職夢碎,政界一度盛傳當時佢意興闌珊,連副局長都唔想撈囉,後來就成功挽留。

文化界選委撐許曉暉



許曉暉至今已出任副局達十年,表現獲文化界肯定,好似港區全國政協委員、文化界選委汪明荃尋日接受電台訪問時就大打開口牌,力讚許曉暉有能力,仲話民政事務局局長劉江華適合做政制多啲。言下之意,係想劉江華調位,畀許曉暉上位喇!

雖然林鄭想新班子有多啲女性,許曉暉年資亦有番咁長,外界難免會有所期望,但係究竟佢係咪林鄭杯茶?相信要等多啲時間嘞!

至於運房局,由於局長張炳良早已表明不再留任,所以有官場吹出嘅風話邱副升呢做局長被睇高一線,然而喺邱副入熱廚房後,運房局所負責範疇都接連爆大鑊,交通就有廣深港高速鐵路香港段、港珠澳大橋等基建超支問題,而房屋問題則有公屋食水含鉛超標等,邱副當然唔可以獨善其身,劣評如潮,依家官場吹出佢升呢嘅風,分分鐘會搞到佢「臨門一腳撻Q」!

副局有冇得上位,好睇局長嘅去留,其中公務員事務局局長張雲正就有傳將於下屆政府出任政務司司長。佢尋日唔評論係咪願意出任司長一職、林鄭有否接觸佢等問題,指要畀林鄭時間同空間做好工作。至於被視為「梁粉」嘅創科局局長楊偉雄亦都唔評論去留,只係話會做好現有工作,答案可圈可點。

贊助商:

討論:
分享: