政情:留低無望蘇錦樑Hea做等收工


2017-04-05 07:00

跟蹤提及過的人和物:

上一則新聞: 中環出更:何啟明囝囝 好彩避過壞電梯

 

商務及經濟發展局局長蘇錦樑(Greg蘇)擔任副局長及局長將近十年,但任內劣迹斑斑,遠嘅唔講,近嘅有免費電視發牌風波同美食車先導計劃等等,所以政界都早已預料佢唔能夠過渡至下屆政府。可能Greg蘇有見局長生涯已進入倒數階段,索性Hea做等收工,所以好似香港電台新大樓、版權問題等都毫無進展囉!

現時港台大樓設施陳舊,經常出現漏水情況,再加上接手亞洲電視嘅模擬頻譜,令到大樓使用情況更加緊張。但係之前提出六十億元嘅超豪新大樓建議,就算減咗磅到五十三億元,都係畀立法會否決,之後就一直石沉大海,直至早兩個月,廣播處處長梁家榮自爆,正就港台新大樓事宜同政府部門傾緊共用問題,亦都透露準備緊新大樓草圖,但係Greg蘇依然毫無反應。

隻字不提廣播處長想法



梁家榮近日就新大樓事宜回覆立法會議員查詢時,都大呻現有大樓地方不足、基建老化,對數碼化發展帶來挑戰,喺新大樓落成前會盡量採取臨時措施去改善,希望維持公共廣播服務水平。

不過,商經局回覆議員陳志全有關港台新大樓嘅時間表時,就答完好似無答,只用兩段文字交代醞釀三年多嘅項目。商經局表示,研究過程中遇到嘅問題較預期複雜,所以港台需要較多時間處理,隻字不提梁家榮早前提出嘅計劃。唔知Greg蘇係咪唔知港台苦況,定係擔心新大樓有進展又要涉及錢銀問題,怕會惹批評就索性乜都唔做呢?

另一議員馬逢國就關心版權問題,《二○一四版權(修訂)條例草案》上年因立法會拉布近三個月,逼到Greg蘇宣布「作罷」,當時佢更炮轟泛民漠視社會公義,扼殺香港經濟同創意產業發展空間,直指要「認住呢班人」。而當局至今仍然信守「作罷」承諾,唔打算喺現屆政府任內重提,亦無再提交立法會審議嘅意圖。

接班人焗執爛攤子手尾



Greg蘇講就兇狠,但做就完全係另一回事,該局回覆馬逢國時完全無提及同草案相關嘅工作,只係依賴宣傳教育工作,實行徹徹底底咁「作罷」,到底佢係咪有心幫香港創意產業發展呢?佢嘅工作態度咁Hea,相信接班人上任時就有大把爛攤子要處理囉!

贊助商:

討論:
分享: