中環出更:田北辰「跳船」後民望飆升


2017-04-26 07:00

跟蹤提及過的人和物:

上一則新聞: 中環出更:飛甩老土眼鏡潘俊彥讚長者潮得起

 

立法會議員田北辰月初與新民黨分手,但最新出爐嘅十大立法會議員,田北辰排名竟然飆升至榜首,而前黨友葉劉淑儀嘅評分亦較三個月前有進步,睇嚟今次分手不但冇拖累到大家,仲加咗分添喎。

香港大學民意研究中心分兩階段隨機抽樣,分別喺今個月三至六日,同埋十至十二日進行,首階段先選出十二名市民最為熟悉嘅議員,再進入第二階段作評分調查,而田北辰就喺第二階段開始首日宣布退黨。不過,佢今次以五十六點一分排第一,而三個月前就不入十大,睇嚟退黨反而幫咗佢,更將香港眾志羅冠聰擠出十大添!

梁國雄包尾跌幅最大



至於新民黨主席葉劉淑儀亦同樣冇被退黨消息所拖累,今次排名較三個月前微升一級,升至第四位。除咗排名,佢連分數都同樣有增長,比上次多咗二點八分,增幅係眾人之冠。

至於榜尾位置就係「常客」社民連梁國雄,今次佢只拎到三十六點五分,比三個月前跌咗二點四分,成為跌幅最大嘅一名議員。另外,公民黨楊岳橋分數雖然高達五十三分,可惜佢嘅認知率不足,所以未能打入十大議員。估唔到平時佢搞埋咁多花臣,都吸引唔到市民注意,睇嚟佢要反省同檢討吓,做番啲實事好過喇!

卓妮

贊助商:

討論:
分享: