政情:郵輪碼頭趕客謝偉俊:似停屍間


2017-05-02 07:00

跟蹤提及過的人和物:

上一則新聞: 中環出更:唔怕DQ鄭松泰再有議辦開張

 

政府斥資逾八十億元興建嘅啟德郵輪碼頭,早前審計署發表審計報告,批評上年整體郵輪停泊船次、旅客人均消費都唔及當初向立法會申請興建時嘅預期,就連立法會九龍東議員、曾經做過立法會旅遊界議員嘅謝偉俊(Paul)亦都狠批政府,話郵輪碼頭營運多時,但個交通配套就搞到「半桶水」。除此以外,阿Paul亦批評碼頭入面十分冷清,仲話好似「停屍間」咁。講到咁恐怖,都係歸咎於商務及經濟發展局局長蘇錦樑(Greg)做得差囉!

審計報告轟部門監管不力



審計報告力數郵輪碼頭多宗罪,當中包括碼頭商業區內有大約一半地方都係吉舖、電視幕牆由營運至今都冇帶來收入、營辦商冇更新交通管理,搞到唔夠免費接駁巴士,甚至連內部嘅維修同保養都做得唔好,搞到七十幾部升降機同自動梯中有成廿幾部都壞過,有啲仲要壞成十幾次,報告仲直指旅遊事務署監管不力添!

郵輪碼頭係Greg蘇負責嘅範疇,雖則被審計署鬧爆,但佢日前回應審計報告時,仍死撐郵輪旅客來港數字已達標,又指有信心郵輪旅遊方面會有持續發展。

倡發展酒吧夜店搞演唱會



唔知係咪覺得Greg蘇咁講,係唔肯認錯,阿Paul睇唔過眼,尋日喺社交網站facebook鬧爆碼頭冷清成個停屍間咁,認為政府應該要充分利用碼頭空間,建議可以發展酒吧、夜店等行業,而且佢仲建議利用碼頭嘅露天空間,得閒搞下啲體育活動同埋演唱會,提高郵輪碼頭嘅吸引力,增加人流。

阿Paul仲鬧爆碼頭嘅交通配套做到半桶水,佢話一路有向政府提出建議,就好似興建連接觀塘同碼頭嘅交通浮橋。佢解釋,浮橋除咗可以紓緩九龍灣、觀塘去碼頭嘅交通問題,同時亦都可以創造更好嘅休憩空間。

老實講,郵輪碼頭營運咗三年幾,亦曾經搞過唔少演唱會同戶外活動,但人流仍然都係小貓三四隻,商場就拍烏蠅,唔知Greg蘇所謂嘅信心又從何而來呢?

贊助商:

討論:
分享: