政情:田北辰另起爐灶 強調唔做一言堂


2017-05-08 07:00

跟蹤提及過的人和物:

上一則新聞: 政情:行會成員林健鋒 唱反調拒撤對沖

 

同新民黨「因了解而分開」近一個月嘅立法會議員田北辰(田二少),近日已另起爐灶,與六名一齊退黨嘅區議員組成新組織,名為「實政圓桌」。佢斷言新組織唔會係一言堂,各人平起平坐。換言之,新組織冇大佬文化?

田二少尋晚喺社交網站facebook(fb)上載多張照片,又貼文指上周五舉辦頌親恩晚宴,指活動有特別意義,事關當晚佢正式宣布新組織嘅名稱,更為名稱解畫。佢指一眾成員喺圓桌內人人平等,不論大事小事亦要坐下討論,甚至「唔啱傾到啱」。

新組織名為「實政圓桌」



換言之,新組織係咪冇「大佬文化」?田二少解釋,係冇一言堂文化。至於佢喺fb寫上只做實事,唔玩政治,係咪真係唔玩政治呢?佢話由於以往話唔玩政治,畀人鬧話呃人,所以新組織「實政圓桌」中嘅「實政」,係強調做實事嘅初心,代表從事務實嘅政治工作,亦希望透過圓桌嘅討論提升政治水平。

佢又話喺圓桌會議中亦會討論佢喺立法會嘅事務,對於某啲問題若冇一致意見,少數必須服從多數,如若出現意見各佔一半嘅情況,佢就擔當仲裁員的角色,最後扑槌。

贊助商:

討論:
分享: