鄧麗欣Loey女排反敗為勝爭護級


2017-06-13 07:00

跟蹤提及過的人和物:

上一則新聞: 克勤開騷穩中求變

 

鄧麗欣(Stephy)帶領的排球隊Loey由四月參加公開賽連輸四場,直到前日在新教練指導下終於開齋贏波,可惜仍然升班無望!Stephy直言餘下兩場比賽非常重要,一定要勝出才有機會成功護級,否則便難逃降班命運。

Stephy前日帶領排球隊Loey到葵芳參加《第37屆全港公開排球錦標賽2017》女子乙組賽事,首局Loey以21比25分落敗,第二局Loey狀態回勇,一度領先對手7分,再以25比20分追回一局。第三局戰況非常激烈,最後Loey以25比17分勝出,局數2比1反勝。受訪時,Stephy表示以平常心面對贏波,又為隊友感到開心:「呢一、兩個禮拜大家都好努力練波,今場波改善咗好多之前嘅漏洞同做得唔好嘅地方。最緊要係後尾打到好緊張,但佢哋都冇畀呢種壓力影響到士氣。」她笑言自己就像媽媽,看到隊友打得好和有進步,感到很安慰。

頸椎受傷未痊愈



提到新教練阿豪,Stephy認為與球隊夾得幾好,大讚對方教女生很有經驗:「我哋磨合咗一段時間,今場開始慢慢適應咗,佢教我哋新嘅陣式,喺場邊都好努力,一路提住我哋。呢個係我哋好想要,我哋好容易發夢,有佢點醒我哋係好好。」至於錦標賽完結後會否繼續合作,就視乎Loey能否成功護級,稍後會開會再作決定,Stephy說:「下兩場比賽好重要,一定要贏,我哋依家嘅分數係升唔到班,目標係想護級,即係唔好降班。」提到早前頸椎受傷,Stephy表示已康復九成,但拉傷的肌肉還需要大約一星期才能練好,所以這次主要打後排,出場時間亦不多。

慶生欠Miki感可惜



談到日前為吳雨霏(Kary)慶生,Stephy覺得她們多年來就如家人一樣:「大家都要出嚟食餐飯,都冇乜特別,傾吓偈、食吓飯、敍吓舊,幾開心嘅。」她透露Kary與一眾好友舉行了私人派對。對於傳與Kary反面的楊愛瑾(Miki)未有到場,Stephy直言可惜:「但冇辦法啦,朋友都係一個緣分嚟嘅,我哋惟有保持我哋呢個關係。」而Miki就日日弄兒為樂,前日上載囝囝首次下水禮的短片到社交平台。

文:音樂組

贊助商:

討論:
分享: