曹永廉畀女圍High爆 被阿田軟化


2017-07-23 07:00
上一則新聞: 港姐「網」羅人氣 黃凱琪餵狗顯愛心

 

藝人曹永廉與田蕊妮主演劇集收視報捷,前晚與台前幕後飯局慶功,二人全程互窒,炒熱現場氣氛。期間阿廉畀女圍享盡溫柔,被阿田取笑「硬晒」;阿廉即時反擊表示只要望一望阿田,也就會「軟化」。

阿廉、阿田、蕭正楠、何廣沛、楊詩敏(蝦頭)和王君馨等前晚到尖沙咀出席新劇《超時空男臣》飯敍,阿田承諾收視走勢持續的話會再「食多餐」。提到40歲的蕭正楠劇中飾演51歲阿廉的大哥,阿田打趣說:「嗰個阿廉唔知食乜嘅,本身擺大壽o架啦!點知出嚟效果望落(年紀)細過阿蕭,呃得吓人。」而太太與子女剛到日本旅行的阿廉於席間「冇王管」,與一眾女拍檔合照時獲「獻吻」,阿田取笑他「硬晒」,阿廉即望一望阿田,「回敬」說:「咁咪軟晒囉!」引得全場大笑。

阿田表示《超》劇令她吸納很多小朋友粉絲:「每晚接姪仔嘅電話,話嬸嬸你好好笑。(老公杜汶澤都喺社交網截圖話好笑。)係呀,佢本身好難會笑,拍呢套劇之前啱啱拍完《迷》,突然對自己演喜劇冇乜信心,咪叫佢畀啲意見囉!」

拍吊高戲被以為抹窗



而蕭正楠與阿廉孖住受訪,談到接下來的劇情,蕭正楠指難忘於北角外景被吊高7、8層樓高:「吊足一個上晝,望到屋入面有人整早餐,人哋以為我係抹窗工人。」阿廉即搞笑說:「有冇吊到失禁?」蕭正楠「反擊」:「農曆新年唔好撞到佢,真係成年冇運行!我係吊到下半身麻痹啫!」阿廉則自爆有相同遭遇:「喺中環成個人凌空吊喺出面,下面幾十呎高,我本身畏高流晒汗,話晒有老婆仔女,你(蕭正楠)就話冇人冇物啫!」阿蕭接口:「乜呀?好多人喊!」

蝦頭咀勻「男臣」



至於劇中「艷福」不淺連咀蕭正楠、阿廉及何廣沛的蝦頭笑說:「拍劇先後咀過黃子華、袁偉豪同梁烈唯等,今次(咀戲)反應正面。(NG?)有,但唔關我事o架!(邊個最好咀?)每個人咀唇texture都唔同,冇得比較。(仲想咀邊個?)想好似胡定欣同徐子珊之前拍劇咁咀,感覺好正。」

另外,《超》劇前晚播出的一集繼續放笑彈,劇情交代蕭正楠、阿廉及何廣沛買雪糕食,一杯雪糕三份「瀨」,hehe味濃。

文:影視組

贊助商:

討論:
分享: