連詩雅鄭融公主反擊戰


2017-08-19 07:00

跟蹤提及過的人和物:

上一則新聞: 石詠莉請鄧健泓食軟飯

 

身材高挑、白雪雪的連詩雅(Shiga)跟嬌小玲瓏、擁有蜜糖膚色的鄭融這個「連融」組合,外形相映成趣,兩人在事業、愛情上各有自己的態度,但她們「鬼妹仔」性格卻又同聲同氣,齊為「港女」被指有「公主病」辯護。

摺埋自己野心細



在歌唱路上鄭融跟Shiga都緊守崗位,對於充滿競爭的娛樂圈,二人野心又有多大?Shiga覺得自己與對方都非野心大的女星,鄭融笑言:「所以好多人話我唔識諗!」Shiga則指身邊人覺得她「唔識做」、不夠圓滑,但鄭融卻反對說:「我覺得Shiga好圓滑,其實每個人性格唔同,冇得比較。」Shiga又承認是個很「收埋」自己的人,但對方比她更甚,鄭融認同說:「世上咁多唔同嘅人、工作同做事方式,唔需要逼自己去改變性格,最緊要舒服咁做番自己。」娛樂圈雖然壓力大,但鄭融覺得自己頂得住:「呢樣都幾緊要,係值得欣賞自己嘅地方,我又冇乜是非、緋聞,最多頭幾年話我肥。有啲娛樂新聞會寫得好衰,但我又冇乜好難頂嘅新聞,所以壓力唔大。」

Shiga則自覺入行後EQ提升不少:「對我嚟講最大壓力、最唔舒服係被冤枉,冇可能次次開記者會澄清或發聲明,可能好多事有啲人淨係聽某一方嘅古仔,即使我點解釋,件事又被放大、沒完沒了,好多時要咕一聲吞咗佢。」又自爆小時常被指做任何事得「三分鐘熱度」:「都唔知點解,可能我幾易洩氣、係掃興王,反而入行後不時勉勵自己『唔好咁易放棄,捱過呢關就OK!』憑住呢個信念走到第七年喇,做娛樂圈係我堅持得最耐嘅一件事。」但她坦言入行後犧牲很多私人時間:「某程度上藝人都幾自私,好多時身邊人要去遷就我嘅時間,其實佢哋都要忙工作。雖然我喺工作上得到滿足感,但錯過咗好多人生重要時刻,要學識取捨。」

Shiga享受獨處



在愛情路上,鄭融坦言不清楚對方的感情觀,Shiga直言少談感情事:「細個嗰陣無時無刻要同男朋友、朋友一齊,唔可以自己一個人,但入行後180度改變,會獨自睇戲、食飯,甚至旅行,渴望獨處嘅時間多咗。可能因為呢行要對住好多人,例如做訪問唔能夠唔講嘢,工作時又不停講,返到屋企只想靜靜哋,一個人望住天花板乜都唔做、唔想郁。」

已有外籍男友的鄭融則承認目前感情生活穩定:「我唔係愛情專家,但覺得傾偈了解對方好緊要,有時工作忙同男友冇乜相處時間,都會最少每星期同佢食一次飯傾吓偈。當有問題出現時,自然會諗點解決。當然要多謝男友畀好多空間我,有時工作好辛苦想有自己空間,佢好明白,可能因為我哋係識咗好耐嘅同學,相處得輕鬆啲。」

做乜針對港女?



Shiga跟鄭融在緣分的牽引下,將攜手於九月舉行演唱會。Shiga認為組合新鮮,鄭融則很珍惜機會,因為有感Solo(獨立)歌手有時會悶,能有拍檔一同表演,可擦出新火花。兩人相識多年,既是同門歌手,又在國際學校長大、有不少共同朋友。鄭融覺得跟對方幾有緣,加上兩人都是獨生女,有很多共通點。

對於時下「港女」一詞,Shiga說:「每個人對『港女』嘅定義唔同,但好多人將佢變成貶義詞,我覺得喺香港長大就係香港女仔。」鄭融則反問何謂「港女」?對於港女被形容為有「公主病」,她笑言女人都有公主病:「睇你多定少,我男友學廣東話,有日佢同我講:『IlearnChinesetoday公主病!』佢話我都有,我話OK!」又笑言梗係賴男友:「佢唔想遷就嗰陣就話我有公主病,幾衰呀!我覺得係選擇性,想有咪有,要冇就冇。」Shiga則說:「樣樣都賴公主病,點解冇公子病呢?唔識做家務、執嘢或者處理自己嘅事就係有公主病,咁如果啲男仔一出世有人幫佢安排晒所有事,點解唔話佢哋有公子病呢?咁樣對女性唔公平,要鬧一個女仔唔好,任何行為都係有公主病。」

後記



鄭融很想邀請組合農夫擔任演唱會嘉賓,直言農夫能帶動氣氛:「佢兩個講嘢好叻,由佢哋講吓我同Shiga,應該幾得意。」加上農夫這對組合,高度差距跟她與Shiga相似,相信會令觀眾開心。她更表示愈來愈鍾意及欣賞港式演唱會,除了唱歌表演,中段時間可以講Talk及感性一番。

文:音樂組

攝:司徒國榮

場地:CEONeway

Wardrobe:Scotch&Soda(Shiga)Spiritunous(鄭融)

Hair:[email protected](Shiga)SteveShek@HAiR(鄭融)

贊助商:

討論:
分享: