政情:電訊 廣播 條例諮詢邱騰華憂難產


2017-10-10 07:00

跟蹤提及過的人和物:

上一則新聞: 中環出更:劉小麗被DQ 捐款照寄立會

 

政府喺上屆立法會已打算申請撥款,開設兩個首長級政務官編外職位,藉以領導一個專責小組檢討《電訊條例》及《廣播條例》。據知,有關諮詢喺聽日嘅施政報告中提出,雖然條例過時,重新檢討對於業界係好事,但當局就恐怕喺依家嘅政治氣氛下,最終會變成版權條例翻版而難產。

恐泛民反對步《版權條例》後塵



《版權(修訂)條例草案》喺上屆立法會最終「作罷」收場,呢條草案本來已經過時多年,完全追唔上國外標準,但當年因為網民有極大反對聲音,導致部分本來有望投贊成票嘅議員,都轉為唔敢支持草案,當中甚至包括建制派都呼籲政府收回,喺唔夠票通過嘅情況下,時任商務及經濟發展局局長蘇錦樑喺立法會宣布「作罷」,仲炮轟泛民為求選票不分是非黑白,叫市民要「認住呢班人,一個一個咁認住」。

但係政府換屆之後,商經局本年度其中一個重要任務,就係檢討《電訊條例》及《廣播條例》,並就此諮詢市民,呢次係由新局長邱騰華處理呢個燙手山芋喇!

兩條例分界模糊料傾向放寬



其實,電訊同廣播之間嘅傳統分界逐漸模糊,因此,兩條條例當中嘅差異有需要整合,而相關事宜亦曾喺相關嘅事務委員會中討論,預計聽日施政報告會提出諮詢,當局亦開始接觸各黨派了解佢哋嘅睇法。根據以往喺事務委員會嘅討論,外界估計諮詢會以年計,預計檢討內容包括跨媒體擁有權、境外投資、收購合併、罰則及發牌等等,以便整合兩條條例當中有較大差異嘅地方,外界普遍認為,最終會傾向有更多放寬。

據了解,當局相信有關條例過時,而業界確實面對經營困難嘅問題,重新檢討有助業界營運,但最擔心會被較激進嘅民主派冠上「引入紅色資本」同「影響言論自由」嘅帽子,最終會變成版權條例翻版,原本支持嘅議員都會因為外界極大嘅反對聲音,而令到條例未能通過。睇嚟要避免歷史重演,當局一開始就要打好呢場輿論戰嘞!

贊助商:

討論:
分享: