政情:楊偉雄否認被架空 唔熟書又獻醜


2017-10-13 07:00

跟蹤提及過的人和物:

上一則新聞: 政情:鬍鬚曾自爆新搞作 偷步開咪疑冇申報

 

施政報告提出,特首將會親自領導創新及科技督導委員會,外界有意見認為創新及科技局局長楊偉雄將會被架空,楊偉雄尋日就政策回應記者嘅提問時,否認被架空,但就噏錯部分資料,要創科局常任秘書長卓永興糾正,即係唔熟書喇!

楊偉雄話創新及科技督導委員會一向都存在嘅,以往由財政司司長領導,改由特首領導該督導委員會,層次更高,喺商討大灣區事情上有好處,對口單位將會係廣東省省長,「我係唔夠班(口架)」,又舉例指新加坡總理亦統領有關創科發展嘅督導委員會。

點知卓永興之後就話係溝通上唔清楚,財政司司長領導嘅委員會係創新科技及再工業化委員會,該委員會現時仍然喺度,係諮詢性質,大部分嘅委員都係非政府人士,當中包括業界,而新成立嘅創新及科技督導委員會所有成員都係來自政府,可以對政策「拍板」。

紙筆記錄冇帶頭用科技



另外,楊偉雄又被問到點解喺記者會用紙筆,冇帶頭善用科技,佢就話自己有平板電腦,仲好喜歡用平板電腦添,但記者會現場嘅光線較難睇得清楚平板電腦,又擔心喺記者會期間用手打字會被認為唔尊重,加上記錄較簡單所以先用紙筆寫字。

贊助商:

討論:
分享: