蔡少芬「師奶仔」港九新界都有屋 炫夫有術張晉愈打愈「金」


2017-10-28 07:00

跟蹤提及過的人和物:

上一則新聞: 憶蓮開騷晒「紋身」Fans送花變掟花

 

港男追唔到女,曾幾何時會狂Loop陳小春首兵仔歌《神啊救救我吧》慰藉,一句「神啊!救救我吧!一把年紀了!一個愛人都沒有!」唱出男人最痛,盡訴踏破天涯無芳草嘅苦情,不過到依家呢個年代,好多港女都話啱聽!唔少男人「身心」都北望神州,話港女做作難服侍,搞到好多港女要北上求愛。好似近年喺內地吸金唔停手,返無綫拍劇集《老表,畢業喇!》嘅蔡少芬,真係有唔少絲打都讚佢老公張晉係絕頂好男人,話係中港婚姻嘅成功例子。咪住先,當日唔少三姑六婆衝出嚟講乜鬼女尊男卑、夫憑妻貴、港姐配窮武師,乜依家見男嘅威到去荷里活拍住史泰龍,又好似失憶咁改晒口,難怪蔡少芬都忍不住寸口:「你哋冇眼光啫!」

集蚊成億九年變出五層樓



蔡少芬有眼光就梗o架啦!經常以「師奶仔」自嘲嘅佢,完全有齊師奶特質,除咗識得放長線等老公發達,呢個絕頂師奶仲最叻收埋啲私己錢,投資亦好有心得,睇吓佢用九年時間,陰啲陰啲滾咗五個物業出嚟,仲要買到遍布港九新界,咩類型都揸番啲,正所謂進可攻、退可守,好似元朗爾巒雙號屋、錦綉花園、灣仔囍匯到油麻地商廈都有。為咗個女嘅校網,佢喺四年前仲買豪宅凱旋門,雖然係細單位但升值能力最高,單係物業保守估計已值過億有多,所以Nuts哥幾時都唔會睇低啲師奶,佢哋慳一蚊得一蚊嘅理論,分分鐘集蚊成億,見嗰啲炒樓嘅全部都係師奶團就知!

其實今時今日以蔡少芬嘅財力,根本唔使做,全靠啲乜?咪就係不停炫夫有術!佢經常360度無死角狂讚個老公,張晉本身已經係太極全國冠軍,佢都願由低做起,替身武師乜都做,曾經做過章子怡同甄子丹替身,仲由內地打到荷里活,但終歸究柢,啲人話佢係老婆一手「捧」出嚟,又真係冇人會反對囉!

港女獅吼嚇唔到中華英雄



好多人以為蔡少芬係「河東獅吼」,查實當年佢同張晉拍拖時,同啲港女一樣,次次吵大鑊都嗌分手,終於有次張晉爆煲話好,佢又即刻嚇窒咗,知道老公係真英雄唔拋得,點化咗佢兩個人相處係冇分高低。好似家陣蔡少芬都成日同人講,老公仲緊要過兩個女,啲女有朝一日會嫁出去,真係好少人會咁諗,可想而知佢幾「遠視」。18歲入行,佢已經承受唔少是非,愛情同家庭帶嚟嘅挫折,令佢睇得更透徹,名利都係虛幻,捉緊眼前人同機會先至最實際。

張晉都好識得冧老婆,當日佢攞金像獎最佳男配角時話:「有人話我成世都要靠老婆,我可以話畀大家聽,冇錯,我呢世嘅幸福就要靠佢!」佢係想話畀大家聽,男人成功背後真係需要另一半強大嘅支持。張晉仲話自己全副身家同物業都可以畀晒老婆,仲話要佢日日「科水」畀零用錢。夫婦同心,其利斷金,就算係窮都窮得恩愛,窮得開心。

Nuts哥

贊助商:

討論:
分享: