祖兒唔阻地球轉 睇好衛蘭做歌后


2017-11-01 07:00
上一則新聞: 側田音樂治療度低潮

 

天后容祖兒早前揚言不會出席樂壇頒獎禮,昨日她現身活動時笑言很怕被人覺得「阻住地球轉」,亦不想為了蟬聯獎項而賴死唔走,她睇好衛蘭可以接棒做歌后。

容祖兒及周柏豪昨日出席Philips飛利浦「全新SonicareDiamondCleanSmart聲波震動牙刷」發布會,提到樂壇頒獎禮將至,祖兒坦言四個頒獎禮都不會出席:「公司同我有共識,今年休息一陣,我今年都冇歌。(你唔去,女歌手獎咪斷纜?)你哋唔好咁牽掛。」

笑阿Sa有毛有翼



問到睇好誰人可以接棒?祖兒稱:「唔好話接棒,我之前都講過,年年都係我其實唔健康,明明都係好,但可能搞到有人覺得我阻住地球轉,我唔鍾意人哋咁諗我,我唔想為咗要蟬聯,就一世賴喺個寶座度唔走。至於今年我就睇好衛蘭,我鍾意佢隻唱片,希望佢得獎,佢唱歌好好聽。(睇好佢攞女歌手獎?)唔知呀,總之我覺得佢今年係最叻。」

講到下周將與蔡卓妍(阿Sa)及鍾欣潼(阿嬌)拍廣告,祖兒坦言很久沒見阿嬌。問到對方是否掛住拍拖?她笑言:「本身都好難約。(阿嬌重色輕友?)我唔好意思咁講,但有呢個嫌疑,不過佢之前都一直拍劇,阿Sa都係做嘢先見到。(你哋依家三個各自有另一半,少見咗?)係呀,往年阿Sa萬聖節都會約我去蒲,但今時今日嘅佢有毛有翼,我要返屋企過。(你可以約男友劉浩龍。)我要返屋企,因為要派糖畀小朋友。(男友都返你屋企?)冇啊!」

柏豪想拍《使徒3》



同場的柏豪力撐劇集《使徒行者2》拍檔黃翠如演技好:「就算佢連續9日通宵、每日瞓一、兩個鐘,但一Roll機就好專業。其實以佢嘅家庭環境,佢係生活無憂,但係佢都好努力。」提到有傳劇集將開拍第三輯,他稱:「有聽過,但未收到官方通知。(你劇中冇死,可以拍第三集。)係呀,如果需要我。(你拍唔拍?)睇吓三哥(苗僑偉)同Benz哥(許紹雄)啲期,佢哋先係最重要。」他又透露之後會到內地舉行巡唱,會邀袁偉豪做嘉賓。

文:音樂組

攝:林蔚恩

贊助商:

討論:
分享: