政情:獄中歷程 周永康學會反思 黃之鋒態度照舊


2017-11-09 07:00

跟蹤提及過的人和物:

上一則新聞: 中環出更:自爆夜潛泳池 羅致光認「犯規」

 

終審法院日前決定受理「雙學三子」黃之鋒、羅冠聰同周永康衝擊政府總部一案嘅終審上訴許可,定於明年一月十六日審理,而繼黃之鋒同羅冠聰早前獲准保釋候訊,服刑八十多日嘅周永康日前亦獲批保釋以等候上訴,佢尋日剖析自己嘅心路歷程,透露喺獄中每日都會反思,又自爆回家後有好多事情都需要適應,舉例指監獄燈光較昏暗、家中廁所使用坐廁等;相比之下,服刑六十九日嘅黃之鋒聲言到監獄係「考察」,又表明回家後唔會再摺被,似乎身陷囹圄一段時間,未有予人明顯嘅改變。

黃之鋒、羅冠聰同周永康喺一四年九月二十六日晚上衝擊政府總部東翼前地,去年被裁定非法集結等罪成立,及後三人遭改判入獄六至八個月,黃之鋒等三人前後腳獲批保釋等候上訴,周永康尋日一連出席兩個電台節目,大談自己嘅獄中生活同埋與家人重聚嘅點滴。

周要重新適應家中燈光坐廁



暫時重獲自由,曾喺獄中服刑兩個多月嘅周永康話依家好多嘢要適應,舉例指家中廁所使用坐廁,而相比起監獄燈光較昏暗,回家後覺得家中燈光光猛,佢笑稱近視同散光都有加深,要去驗眼。周永康又話,自己喺獄中服刑八十多日,每日都會反思,並指愈來愈覺得要做一個覺醒嘅人,唔好被表象蒙蔽,佢又提及監獄內嘅營養餐相對清淡,故現時較入獄前瘦咗三至四公斤,監獄牆上雖然貼出「食物金字塔」海報,但發現同所食嘅營養餐單水果分量不符,佢曾就此向職員多次詢問係由邊個制訂呢個餐單,但未能得出答案,最終嗰張海報更消失咗,佢對此感到詫異。

黃指囚禁屬「考察」表明「唔摺被」



相比之下,服刑時間較周永康略短,較早保釋候訊嘅黃之鋒,接受傳媒訪問時以「考察」形容被囚禁,又質疑監獄係一個冇選擇、冇獨立思考,只能夠聽話嘅地方,加上佢事先張揚,回家後唔會一如喺監獄中摺被,似乎懶理其父親曾「投訴」佢唔摺被,黃之鋒坐監後有冇「覺今是而昨非」,答案可謂不言而喻。

此外,對於周永康喺電台提及多項監獄情況,懲教署發表聲明不點名反駁周永康,指「署方唔會因應個別人士嘅選擇或偏好而制訂相關措施」,強調會以公平、合法同合理原則,確保每名在囚人士獲得適當待遇。署方並指膳食標準分量同營養成分均由合資格營養師釐定,並獲衞生署認可。

贊助商:

討論:
分享: