湯寶如被曹永廉寸NG王又老又好肉


2017-11-17 07:00
上一則新聞: 吳浩康開騷盡量唔出貓

 

湯寶如舉行演唱會慶祝入行25周年,碌爆人情卡邀得多位嘉賓表演,校長譚詠麟歡迎湯記加入「年年25歲」的大家庭,大讚聽她唱歌似飲補湯。而曹永廉跟湯記鬥嘴互窒,湯記不甘被寸反擊阿廉「老」,叮囑冇乜做過嘉賓的他要「定啲嚟」。

湯寶如為慶祝入行25周年,前晚假九展舉行《湯寶如獨愛音樂25周年演唱會》,碌爆人情卡,邀得陳曉東、曹永廉、黎瑞恩、薛家燕、黃翊、黎小田及譚詠麟做嘉賓,非常熱鬧,台下有周慧敏來捧場。阿廉跟湯記在演唱會上互寸鬥嘴,合唱《相思風雨中》時,阿廉拖住湯記的手說:「隻手好好肉,好有福氣。」湯記反擊叫他不要緊張:「知你少做嘉賓,定啲嚟,要照顧老人家。」

為黎瑞恩慳番成本



阿廉繼而笑她老:「記得你好似25歲入行,恭喜晒,咁就50歲,個樣唔似。」現年46歲的湯記即反擊:「就嚟追到你54歲。」之後阿廉趁湯記返後台換衫,再大爆主持《流行經典50年》的事:「有湯記喺度我信心大好多,因為佢NG多啲。」認真抵死!

黃翊坦言妒忌湯記可以開個唱,湯記即祝他快些開騷。輪到老友黎瑞恩出場時,兩人合唱《乾一杯》,湯記重提5年前黎瑞恩為她做嘉賓卻不慎在樓梯仆倒,她笑說:「今次為咗你特登冇咗樓梯,成本慳番晒。」而黎小田則爆響口已邀得湯記做其明年2月個唱嘉賓,還有久未在港表演的周華健。薛家燕高唱《皆大歡喜》,又大跳經典十字步,獲男歌迷送上洋娃娃,她笑說:「估唔到我呢個年紀仲有吸引力,應該係地心吸力嘅問題。」

譚詠麟壓軸出場,全場High爆,校長對湯記笑說:「恭喜晒!歡迎加入25歲嘅大家庭。」他指湯記是寶麗金年代的歌手,即是自己人,所以湯記開口邀請他即到,校長讚她唱歌好有味道,還搞爛Gag說:「湯寶如掉轉就係『如寶湯』,唱歌好似飲補湯咁。」

文:音樂組

贊助商:

討論:
分享: