阿嬌低胸搶Fo男友呻睇蝕晒!


2017-12-08 07:00

跟蹤提及過的人和物:

上一則新聞: 賴慰玲誕B母子平安

 

歌手鍾欣潼(阿嬌)未有因拍拖而吝嗇美好身材,前晚以黑色DeepV裙現身頒獎禮,但承認男友賴弘國有微言怕她被「睇蝕」!提到如何度過相戀後首個聖誕節,阿嬌有意重拾鑊剷,為男友炮製聖誕大餐!

有愛情滋潤的阿嬌心情勁靚,奪得「人氣廣告代言」獎的她穿上性感DeepV裙領獎,問到一身性感造型可有給男友賴弘國過目?她說:「佢都覺得太Sexy,話睇蝕晒!(唔畀你着得咁性感?)咁做嘢嘛,佢明嘅。」問到聖誕節如何與男友慶祝?阿嬌坦言已知道要開工不在香港,若有機會想與男友一齊布置聖誕樹:「睇機緣喇!我就已經買咗聖誕樹!(男友飛嚟搵你?)佢會盡量就我嘅,但我都喺上海,唔喺香港!(咁男友變身聖誕老人去上海搵你?)唔好扮呀!我最怕Cosplay,扮咗我扣佢10分。」阿嬌又透露未有時間挑選聖誕禮物,或者會給男友下廚:「我煮嘢OK嘅,只係好耐冇煮啫!」講到前緋聞男友余文樂結婚可有恭喜?她說:「未恭喜!好少見到佢,見到都會嘅。」

克勤入「五」狂掃三獎



同場的李克勤贏得「本地男歌手」、「最具號召力香港男藝人」及「年度熱搜歌曲」,前晚正是他的50歲生日,獲大會送壽包賀壽。講到克勤入「五」?他笑說:「我23歲啫!有人25歲(譚詠麟),我點敢亂認,輪輩分嘛!」問到可會忘記太太盧淑儀的生日或紀念日?他說:「呢個係死罪!有時都會疏忽咗,咁咪重手啲買番嘢補數囉!」並透露明年夏天已計劃與家人坐郵輪去希臘玩,雖撞正世界盃,但未必會現場睇。

另外,天后容祖兒再度為百老滙拍攝全新一輯廣告,邀請到好姊妹Twins的阿嬌與蔡卓妍(阿Sa)一起拍攝。期間,三人為配合「搞爛Gag」主題而施展渾身解數,祖兒更舉手自認「爛Gag王」,不忘引用阿嬌的金句搞Gag:「個個都鍾意玩,唔通個個都可以玩極都唔攰咩!」令所有工作人員爆笑!

文:音樂組

攝:鄭家俊、司徒國榮

贊助商:

討論:
分享: